ييجى الكرب
وراه الكرب
ومش بيفوت
وأنا ولا قادر أشكى خلاص
وبأخلاص ألم وسكوت
يرد شيطانى ويشمت فيِّه
يبقى تموت
شوف لمَّا وفجأه
تلقى العيش
تمنه مفيش
وكنت بتاكل
يوم شيكولاته ويوم بسكوت
يرد شيطانى ويشمت فيِّه
يبقى تموت
سبحانه معز
سبحانه مُذل
مالك الدُّنيا والملكوت
يرد شيطانى ويشمت فيِّه
يبقى تموت
تبقى عزيز ف الدُّنيا بحالها
وتعيش حالها
وفجأه تلاقى طين أوحالها
وكأن رب الكون أوحى لها
تمسك عنك حتى القوت
يرد شيطانى ويشمت فيِّه
يبقى تموت
عندك كل علوم الدُّنيا
وأستاذ فيها
جواك خير
لو يتوزع على كل الدُّنيا هيكفيِّها
لكن الدُنيا مبتدِّيش
الأ الهلفوت
يرد شيطانى ويشمت فيِّه
يبقى تموت
حتى أعز الناس على قلبك
عرفوا وسكتوا
ولا واحد منهم قالك كلمه
ولاحتى أشاره من غير صوت
يرد شيطانى ويشمت فيِّه
يبقى تموت
وكأن الهم جوه جيناتك يوم محطوط
شوف بتصلى الفرض بفرضه
وتعيش مسكين فى الكون على أرضه
وبستغفر ليل ونهار
لكن الهم زايد برضه
ولايوم باين طوله وعرضه
وماسك جسمك همك مرضه
وصوت الدمع جواك مكبوت
يرد شيطانى ويشمت فيِّه
يبقى تموت
كل حياتك هم ف هم
فقر ف دُّنيا وفقر ف دم
ولاعاد حد حبيب مهتم
أسمع منى وأشرب سم
راح ترتاح وأكيد هتموت
يرد شيطانى ويشمت فيِّه
يبقى تموت
لكن فينه تمن السم
وأحنا يا عم
ولايوم مرتاح ولا يوم مظبوط
يرد شيطانى ويشمت فيِّه
يبقى تموت
وكأنك تايه
أو مسجون وكمان مربوط
ضربه وضربه
والفترات بينهم متقاربه
وكأن الدُّنيا بتنهش فيك
من دمك شاربه
قافله عليك باب الهم
مش حتى مواربه
واخد على راسك
ضربه ومخبوط
بحديد نبُّوت
يرد شيطانى ويشمت فيِّه
يبقى تموت
=========
مستر /عطيه الخضرى
قلين-كفر الشيخ
يرد شيطانى ويشمت فيِّه يبقى تموت
2017-09-10, 00:52
