ياكل مسئول ف البلد
مبتستحيش
واخد وظيفتك وسيله
للسرقه والتحابيش
والناس بتاكل ف الزلط
علشان تعيش
الناس خلاص م القرف
معدتش لاقيه العيش
منتش مخلد
ومسيرك تغور
والضرب بالبراطيش
وسيرتك هتبقى
حبة خطوط طراطيش
لودامت لغيرك
مكنتش جاتلك
اصل الخلود ميجيش
وبيت النتاش
مبيعلاش
مهما يكون سطحه
بالبوص وبالتعاريش
المنصب داوهم
لابس قميص كرانيش
يادوب ينشد فتله
تلقاه خيوط من خيش
قلب نتن من جوه
وماسحه بالورنيش
يظهر بسرعه معدنه
زى مسمار مصّدِى
مدقوق ف رجل النيش
بكره الضوافر هتاكلك
وتنهش الخرابيش
عدَّى زمان المنظره
والفشخره
والبدله والترابيش
بكره الحمام يكبر
يبقى ف جناحه الرِّيش
ينقر ف راسك نقر
ويعلا صوت الفقر
العيبه متعدّيِش
ندعى عليك ف العلن
ونقول وما نخبيش
اللهى ينتقم منك
أنته وأمثالك
المفسدين ف البلد
واللى عاميهم طيش
واللى م قوت الغلابه
بيدكنوا تحويش
يارب خدهم كلهم
واحرقهم ومتخليش
واللى ضميره حى
يارب تبارك له وبالسعاده يعيش
=======
مستر/عطيه الخضرى
ياكل مسئول ف البلد
2017-04-23, 21:41
