الوضع سىء
وعمَّال يسوِء
مليان طلاسم وكمان مشفَّر
وتقُوللى وفَّر
وضع الندامه
والهم يامه
والناس ف صدمه
ولاعادش فيه بينَّا ابتسامه
واللى دايس ع الغلابه
المُفسدين واللمامه
أخترته ليه؟
وعملك أيه؟وماعادش فيه غير الملامه
المصرى تايه
وسط الظلام وسط القتَّامه
ماشفيتش عينه غير عتَّامه
وشُّه اللى كان يضحك ف يوم أصبح معفَّر
==============
الوضع سىء
وعمَّال يسوء
مليان طلاسم وكمان مشفَّر
وتقُوللى وفَّر
===================
الميه نار
والكهربافواتير مرار
كلُّه بيدبح ف الفقير
من غير ما حتى ينبهه
ولو بكلمه اعتذار
راح يعمل ايه
غلبان يا عينى والأمر صار
والمشنقه
متعلَّقه
على مدبح الأسعار
والحكومه عمَّاله تجرى
وكل حبه تقول قرار
أدبح وخلَّص ع الفقير
معدتش فيه تانى انتظار
وضع الحياه أصبح يكفَّر
==============
الوضع سىء
وعمَّال يسوء
مليان طلاسم وكمان مشفَّر
وتقُوللى وفَّر
==============
الصحه ضاعت
تعليم وباظ
ولاعادش ينفع أتعاظ
والهم هيجيب انفجار
ف قلب مصرى فقير متغاظ
بيبيعوا فيه
مين يشتريه؟
حته بحته
ف سوق عُكاظ
وعدش قادر يوم يصرَّخ أو يصفَّر
=======
الوضع سىء
وعمَّال يسوء
مليان طلاسم وكمان مشفَّر
وتقُوللى وفَّر
================
هيوفر أيه؟
شىء مش لاقيه
ولاحاسس بيه
حتى الموجود
معدوم او محدود
ومش كافيه
ويقولوا وفر
وكأن بيقولوا لأصلع
شعرك طويل لازم تضفَّر
============
الوضع سىء
وعمَّال يسوء
مليان طلاسم وكمان مشفَّر
وتقُوللى وفَّر
============
مستر/عطيه الخضرى
الوضع سىء وعمَّال يسوء مليان طلاسم وكمان مشفَّر
2016-06-29, 13:58
