الكهربا تقطع ساعات
والوظايف للمعارف والخِوات
والعجزبرضه
فى الاقتصاد والاحتياط
وللجماعه دايما يفصَّل
ف سياسات
يظبط لهم
احلى قرارات
مش تبقى دى
برضه انجازات
يوعد ويخلف
يخون ويحلف
والدماءبتهون عليه
ولاهمه عايش
ولاهمه مصرى
فى عهده مات
يعرف يفرَّق
يعرف يغرَّق
يعرف يحذربالصوابع
يعرف يبرَّق
يعرف يغرب
للامريكان
ولايران يعرف يشرَّق
ولاعدش يعرف يوم حبيب
ولا عاد يفرَّق
عايِّيشنا ف الخوف والشتات
مش تبقى دى
برضه انجازات
زرع المخاوف
يعرف يهادن
يعرف يساوف
زرع الكراهة
عِشنا معاها
كل لحظه فى المتاهة
وكل واحد م الجماعه
فى كل وقت وكل ساعه
كل غرضه ف الوجاهة
ومصرنا عينى عليها
ضاع علمها من نِدَّاها
حتى النشيد
مبقاش معاها
ياخلق هووه
حرام كفاها
اخوانكوا ليه
شمِّتوا فيها عِدَّاها
زرعوا الفتن بين الفئات
مش تبقى دى
برضه انجازات
عايز علاوه
طاب خُد علاوه
علشان تحس بالغلاوه
تاكل فواكه
تعمل دماغ اخر حلاوه
وتمللى ريحتك طيبه
عنبروجاوى
بس الخِطط
تخطيط نقاوه
حد اقصى
وحد ادنى مرتبات
مش تبقى دى
برضه انجازات
خلاص كده
صرنا حبايب
خد لك بقه
قانون ضرايب
واهو العيار
على ايده صايب
الضريبة اصبحت عشر اضعاف
بدأت عليك تنزل مصايب
راح تعترض
وتقول حرام
لكن هتدفع من سُكات
مش تبقى دى
برضه انجازات
والوضع بايخ
استبعدوا كل المشايخ
والمصرى دايخ
هيروح لمين
يسمع لمين
يشكى الانين
خلاص بقه
بقه مصرى شايخ
ما بقيتش
باينه له صفات
ينقتل فى يوم جنود
والفساد يكتريسود
والغوله تقدر ع الاسود
وينخطف كمان جنود
وتُنتهك حتى الحدود
والمصرى تطلع ملته
والمصرى بتزيد عِلِّته
مصرى بصحيح
لكنه زى قِلِّته
عايش قرف وليالى سود
ولاعادش يوثق
ف قيادات
مش تبقى دى
برضه انجازات
انجازات
ايوه انجازات
وميت فشر
احلى انجازات يا بشر
قلة امان
وبلطجه
ارهاب بجد
راح ينتشر
ولاعادش هيبه لاى دوله
زى ما بصبعه أشر
اطلق سراح
كل الطوايف فى السجون
والمحبوسين
عشان ارهاب
فى الثمانينات والتسعينات
مش تبقى دى
برضه انجازات
فى كل بيت هتلاقى خيره
ومش هتلقى حد غيره
يقدريواكب
يو م مسيره
ولايوم هتلقى
حد مخلص وف ضميره
عمره ما يخلف مره وعد
قدام عنيه
حاطط فقيره
حافظ حديث المصطفى
حافظ سِوَّر وكمان ايات
مش تبقى دى
برضه انجازات
هل راعيتوا ربنا
فى كل واحد مننا
هل الرئيس
يعمل لنا
ولا جاى يخمنا
وقاصده ياكُل لحمنا
او جاى يكسَّر عضمنا
أو قاصده يوم هيذلنا
عمَّال يتقَّل حِملنا
قاصد يفرَّق شملنا
يارب وحِّد جمعنا
يارب والهِمنا الثَّبات
مش تبقى دى
برضه انجازات
وجاى يحرق دمنا
يحلم لنفسه مش لنا
ياكل من فى حزبهم
بيصدقونا كذبهم
لو دامت لغيرهم
مكنتش يوم
وصلت لهم
لوكذّابين
وبتوع مصالح
يارب خلَّص منهم
لو قصدهم
خير للبلد
يارب قوِّى عزمهم
لو قصدهم
يسرقوها
ويبيعوها
يارب تقلع جذرهم
فوضنا يارب اليك
كل امورنا
وامرهم
جمَّعنا من بعد الشتات
مش تبقى دى
برضه انجازات
===========
مستر عطيه خضرى
يارب خلَّص منهم
2013-06-26, 00:53
