ريسنا مُرسى
صباح شريف
انامصرى
واحد من الريف
مانيش لاقى
اجيب ملبس
ولاقى تمن لرغيف
مانيش لاقى
ف حته أمان
ولاعارف اعيش انسان
ولاشايف لها نهايه
وانا عايش على التسليف
خلاص قربت ع التخريف
ولاعاد ينفع التاليف
أنا مصرى
أنا مُسلم عارف ربى
مانيش سلفى
ولا اخوان ولا انقاذ
ولاعُمرى وللباطل
فى يوم هنحاز
أنا و أولادى
صوتنا تكون ريِّس
وكان انجاز
لكن شوره وكات سوده
ولاخدناش غير الالغاز
لاعيش موجود
ولاموجود فى يوم الغاز
بقه يرضيك
ياسى الريِّس
نموت م الجوع
بقه يرضيك
يموت واحد ورا واحد
وقلب الام
م الحسره يبات مفجوع
بقه يرضيك
تكون ريِّس بلا موضوع
بقه المشروع
يجوع واحد
يموت واحد
يتوه واحد
ونتفرق
ولامره بنتواحد
واحلامنا وثورتنا
اهى ضاعت ألم ودموع
كانوا سارقينها بتمشى
واهو الواحد يبات
امن ومتعشى
ولما تعود على ايدك
يبات دمعى على وشى
أنا اسف
مانيش قاصد
على عينى
بقولهالك ومن وَشى
يا تصلحها
وتعدلها
يا اما تسيبها وتمَّشى
لا انا لاقى عمل فيها
ولا لاقى لعيلتى
فى يوم ما يكفيها
ولاهمك
وباسنانك ماسك فيها
انا مكسوف من اولادى
ولاقادر اوريهم
ف يوم وِشى
يا اما تسيبها وتمَّشى
2013-03-07, 01:30
