شايف يا عم يرضيك كِده
الناس تعيش متنكِده
مبقتش فيك متأكِده
اللى مش لاقى اللى ياكلُه
واللى غرقان وف مشاكلُه
واللى مقهور م الزمن
واللى الزمن ولا يوم ضحك لُه
واللى مفتوحه لغيره
تييجى عندُ تنحبك لُه
كل الطُرق متقفِله
حتى الامل ولا فيه طريق
ينسلك لُه
يمكن صحيح أحلام كبيره
لكنها متقلَّده
شايف يا عم يرضيك كِده
الناس تعيش متنكِده
مبقتش فيك متأكِده
30 سنه كانت بتمشى
من غير مشاكل
رغم اللى سارق واللى واكل
من يومها كانت الاحمال
فى الكهربا
ولا كاتش تقطع
وأزمة الغاز لو تطوِّل
كات يا دوبك تنتهى من بعد يوم
من غير مشاكل
رغم انهم كانوا كلهم
عصابه صُحبة بلطجيه
ما كنش فيه ولا بلطجى
ولاحد يقدر يوم يشاكل
كات الحياه ماهيش نعيم
لكنها من ده وده
شايف يا عم يرضيك كِده
الناس تعيش متنكِده
مبقتش فيك متأكِده
مش قدها
ارحل بسرعه عنها
سيبها لناسها وأهلها
سيبهم يشيلوا حُملها
بانت فولُتها
فى ايدك ايه تعمل لها
سيبها لحد يِلِّمها
يعيش لِها
ولاحد يضحك يوم عليها يخمها
ولا تنسرق ذرة تراب من أرضها
ايوه بصحيح انته ابنها
مخلص وطالع منِّها
سيبها لحد
ماهوش تابع لفرقه وحزب
سيبها لحد
صادق وعوده ميقًُلش كِذب يُضُرِها
عايزينها تبقى غير كِده
حُرَّة أبيَّه
متشمتوش فيها العِدا
شايف يا عم يرضيك كِده
الناس تعيش متنكِده
مبقتش فيك متأكِده
سيبها يا شيخ مع غُلبها
يكفى بقه كُتر المرارة ف قلبها
ولا انته منتش ابنها
ولا كلت صدق ف أرضها
مش طالبه منك
غير بس يرجع حقها
الحق باين والكُل عارفه
مش طالبة يوم تحلِب لها
عَمَّر لِها
اسعد قلوب كُل أهلها
الخير كتير
ومصر امنه
زى ما قالَّك ربها
انسى الاساوه وحِبِها
الخير كتير
لملم وفّرَّق
اقعد بقه على ارضها
ووبلاش تغَرَّب أو تِشَرَّق
الغُوله قاعده ع الحدود
بعيون تبَّرَّق
اعدل بقه
بين الغنى وبين الفقير
بين الصُغَيَّر والكِبيِّر
اياك تِفَرَّق
لملم عِويس
وأخوه موريس
والبت هايدى ومسعِده
أمِّن بقه
أصل البلد
على كُل حال مِتهَدِدِه
شايف يا عم يرضيك كِده
الناس تعيش متنكِده
مبقتش فيك متأكِده
------
عطيه الخضرى عطيه
شايف يا عم يرضيك كِده
2012-10-16, 00:24
